اليوم امنحكيلكم على قصتى مع الربع جنيه
فى يوم من الايامات مشيت للمعهد,و زى العادة وزى كل يوم لازم ناخد مكياطى, لكن هاديكة الفترة كنت انعانى من
الافلاس لان الخدمة قاتله بعضها والسوق راقد, المهم اضربط على الجيب القيت ربع جنى بس والمكياطة زى
ماانتو عارفين بخمسين قرش, كيف الراى توا راسى بيطّربق لازم ناخد جرعة دورة نشبح واحد من صحابى والمثل
يقول الصاحب على الصاحب يبيع عباتة لكن الّى صار العكس, طلبت منا ربع القيتا امفلس احرف منى وحق تاكسى
مرواحتا لجنزور ماعنداش ,قلنا معليشى دورة خوكم وشبح ربع طايح قلت شن الحظ الّى عندى اليوم ياسلام اكيد
مداير خير فى حياتى ,لكن المشكلة المكان زحمة والعيون كلها على الربع كيف اندير كيف اندير مشيت بحدا الربع
ودفيتا برجلى فى خن باش ما يشبحا حد وقلت لصاحبى هى نمشو للزرقاء انهيجو شوى لين تفضى الزحمة بعدين
انولو ونقيمو الربع لكن هيهات بعد ماولينا القيناه مقيوم شكلا واحد كان يراقب فينا ,هه حتى هوا مبلغ كبير
(ربع),بعتالى حسيت براسى بطير وليت زى المهبول دورة اتصلو بيا صحابى قلنا اكيد قربت تنحل ولكن ياللاسف ولا
واحد عنده ربع جنيه حسيت وقتها ان الربع مبلغ كبير رسمى وفجاة يطلع ولد صاحبى عمرى ماكنت نتخيل انى نلقا
عند ربع عند الحق الراجل يسكن فى تاجورا يبى ميزانية ليبيا باش يمشى ويجى للمعهد لكن سبحان الله يضع سره
فى اضعف خلقه القيت عنده ربع وكنت سعيد وقتها ولا الولد احسن واحد فى الدنيا فى نظرى ومن غير كترة دوا
خديت منا الربع وطرت طول للمقهي إلى برا وانى خاش من الباب اتلقتنى وهابة وقتلى جيبلى مشروب قلت يالطيف
ضاعت الخمسين لكن فوجات بانها اعطتنى فلوس باش نشريلها مشروب وقلت سبحان الله كان الوهابين كلهم زيها
وجيت لمولا الكاسة وقتلا اعطينى وحدة مكياطة ووحدة مشروب وجيت من مدلا الفلوس القيت فى ايدى 75 قرش
طلعت الوهابة عاطيتنى ربع جنى بس وقتها حسيت انى نبى نقتلها لكن الله غالب هادا المكتوب اخديتلها مشروب
وقعدت من غير مكياطة وروحت طول للحوش وارقدت وكان اصعب يوم فى حياتى وانشاء الله ربى مى وريكم يوم زيا.
السبت مارس 28, 2009 1:03 pm